NOVA XUNTANZA: BLACKSAD

Despois dunha parada obrigada por partos e demais cousiñas, retomamos con forza o noso clube de lectura de BANDA DESEÑADA. Desta volta, cun clásico moderno: a serie Blacksad. Comezaremos co primeiro título (hai xa tres editados, e ademais un libro co proceso de creación e entrevistas aos autores, moi interesante).

Iniciamos a aventura, pois, con "BLACKSAD, Un lugar entre las sombras" (editado por NORMA) Estamos ante unha obra do máis peculiar: personaxes animais, un realismo no debuxo despampanante, un dinamismo nas escenas que dá a sensación de estar vendo cine,... En fin, unha obra mestra.
A nosa reunión para falarmos deste primeiro libro será o vindeiro sábado 27 de xuño, ás 11:00h. (como de costume), no telecentro do Concello de Betanzos (se hai algunha modificación de última hora polo lugar, alí estaremos para avisar).

E aquí van algunhas propostas para reflexionar sobre a lectura:

- A maneira en que os autores asocian animais a diferentes tipos de personaxes é moi interesante. Analiza uns cantos destes personaxes e observa que forma animal teñen. Cales son os rasgos específicos do carácter de cadaquén?

- Esta obra conta con moitos recursos tipicamente cinematográficos. Por exemplo, utiliza abundantes "contraplanos", é dicir, cambios de perspectiva da cámara, de maneira que nunha viñeta "eu te vexo a ti" e na seguinte "ti me ves a min". É dicir, trátase de cambios de perspectiva. Intenta localizar algúns exemplos de contraplanos (unha pista: na páxina 28 hai un entre o detective e o policía).

- É típico no cine atopar "movementos de cámara". Pero tamén na banda deseñada. Un deles, moi utilizado en Blacksad, é o TRAVELLING (consiste en que dá asensación de que hai unha cámara que circula polo escenario). Atopa algúns exemplos.

- Tamén hai aquí un uso dos planos excepcional. Busca algúns dos que máis che gustasen e compárteo cos compañeiros do club (Ex.: un primeiro plano especial, un plano americano que nos gusta pola sensación de movemento que aporta, unha panorámica espectacular, etc.)

- E o máis importante: trae á reunión a túa opinión, as túas impresións, que che fixo desfrutar máis e que menos. E cóntao. Quizais fagas que outros desfruten igualmente.

Ata a vindeira reunión, e BOAS LECTURAS!!

Ficha da obra:

"BLACKSAD, Un lugar entre las sombras"

Editorial NORMA

Guión: Díaz Canales

Debuxo: Guarnido

La Mansión de los Pampín - Miguelanxo Prado

LA MANSIÓN DE LOS PAMPÍN
Norma Editorial

O autor: Miguelanxo Prado
Indiscutidamente, o autor máis importante na historia da banda deseñada galega. Comezou na pintura e a finais dos setenta iniciou a súa andaina no cómic, participando en 1979 na fundación do fanzine “Xofre”. Colaborou en revistas como “Creepy”, “Comix Internacional” e “Zona84”. En 1985 publicou “Fragmentos da Enciclopedia Délfica”, o seu primeiro álbum en solitario, ao que seguiría “Stratos” en 1987. Realizou para o magazine “El Jueves” a serie “Quotidiania Delirante” que duraría varios anos. En 1990 publicou o seu álbum máis celebrado, “Trazo de xiz”, que obtivo repercusión internacional. Outros aclamados álbumes seus son “Stratos” ou “Tanxencias”. Con guións alleos realizou bandas deseñadas como “Pedro e o lobo”, ou a serie “O Manancial da noite”. Con todo, moi pouca da súa obra dispoñible en idiomas como castelán ou portugués pode conseguirse en galego, sendo unha destacada excepción o álbum “Páxina crepusculares”, editado en 1993 pola Deputación da Coruña e que contén historias curtas de orixes diversas. Foi o creador do Xabarín da TVG e todos os personaxes da serie “Os vixilantes do Camiño”. En 1998 foi requerido pola factoría americana Dreamworks para deseñar os personaxes da serie de animación “Men in Black”. Ese mesmo ano entrou a dirixir a revista sobre banda deseñada “Elipse”, editada pola Consellería de Cultura e da que só saíu un número. Tamén desde 1998 dirixe o salón “Viñetas desde o Atlántico”. En 2003 viu a luz a súa colaboración co famoso guionista de Sandman, Neil Gaiman, no libro colectivo “Noites eternas”.
(Fonte: www.culturagalega.org)

- Miguelanxo Prado caracterízase, entre outras cousas, por lograr un xogo eficaz de planos cinematográficos: sabe cando un plano medio ten que suceder a un primeiro plano. E sabe tamén utilizalos para que teñan sentido na historia. Trata de atopar nesta obra un exemplo de cada un dos seguintes planos:
Plano detalle
1º Plano
Plano medio
Plano americano
Plano enteiro
Plano xeral
Panorámica
Encadre en picado
Encadre en contrapicado

- Os seis capítulos dos que consta o libro teñen algo en común na súa forma de comezar. De que se trata? A que cres que se debe esta coincidencia?
- Existen dúas páxinas na obra que teñen unha estrutura exactamente igual. Ademais, os diálogos son moi semellantes. Poderías explicar que pretendeu o autor con esta coincidencia? Atopa tamén as diferenzas que hai entre unha páxina e a outra, e intenta adiviñar canto tempo pasou entre unha e outra a partir deses cambios.
- É tamén frecuente en M. Prado atopar o que se chama “contracampos” (Ex: un home na costa mira ao mar; na seguinte viñeta vemos ao home dende o mar). Trata de encontrar algún caso deste tipo.
- O “zoom” (acercamento ou afastamento nunha escena) fai que a atención se centre nun determinado aspecto da historia. Intenta localizar algún no libro.
- Na páxina 31 o autor “deixa caer” a súa visión sobre a forma actual de construír vivendas nos pobos. Pero consígueo sen palabras. Localiza este momento.
- Outro elemento tipicamente cinematográfico é o “travelling” ( a “cámara” viaxa polo escenario. Serás quen de buscar algún?
- É frecuente en M. Prado unha excelente caracterización dos personaxes, tanto a nivel físico como psicolóxico. Cal dos personaxes che parece que está mellor construído? Por que?
- Para rematar: poderías atopar algún personaxe con cualidades positivas?

O vindeiro día de xuntanza podes traer cantas opinións che apeteza acerca da obra. Todas serán benvidas!!

"ARRUGAS", de Paco Roca

OBRA: "Arrugas" AUTOR: Paco Roca
EDITORIAL: Astiberri

"Arrugas" á a banda deseñada española de moda, sen dúbida. Un tema “serio” (o Alzheimer), e os premios ao mellor guión e mellor álbum na pasada edición do Saló del Cómic de Barcelona o avalan e o converten nunha obra propicia para introducirse no mundo do cómic. Publicado orixinalmente por Delcourt en Francia, tamén alí colleitou éxitos entre o público e a crítica ao ser seleccionado pola ACBD entre os 20 mellores álbumes do año.

Nun CLUB DE LECTURA DE BANDA DESEÑADA é importante ler a obra con calma, con tranquilidade, e con tempo. Pero tamén é esencial tomar notas, pegar post-it, escribir ideas. Por iso, para axudarche a analizar a obra con certa orde, propoñemos unha serie de puntos a seguir (que non son obligatorios, senon simplemente orientativos).

Aquí van as suxestións a ter en conta para a súa lectura e o seu comentario na seguinte reunión do club de lectura (O 28 DE FEBREIRO, ÁS 11:00, NO SALÓN AZUL DO EDIFICIO LICEO DE EBTANZOS - PARA NENOS A PARTIR DE 10 ANOS E PARA ADULTOS DE ATÉ 150 ANOS):

o A obra ten carácter dramático, pero alterna este dramatismo con momentos de humor. Localiza os máis interesantes. Cres que estas doses humorísticas lle quitan seriedade á historia?
o Os dous personaxes principais (Emilio e Miguel) experimentan un cambio na súa personalidade ao longo da historia. Podes explicar en que consiste?
o Nesta historia utilízase con frecuencia a “cámara subxectiva”, que consiste en dar a sensación de estar vendo o que ve o protagonista (como se levasemos unha cámara ao ombro a medida que actuamos). Podes localizar algúns destes momentos? Que aportan á historia?
o En ocasións os silencios en banda deseñada din moito máis que as palabras. Busca varios destes momentos na obra e di cal che impactou máis.
o Hai obxectos nesta obra que teñen moitísimo significado. Un ejemplo: as escaleiras que aparecen por primeira vez na páxina 20. Que significan estas escaleiras e que importancia teñen na historia?
o Tamén se caracteriza esta obra polos seus “flash-backs” (saltos ao pasado). Busca varios deles, e conta cal che gusta máis. Por que cres que hai tantos destes momentos?
o Cres que o comezo da obra é acertado? E o final?
o A obra pode ter tamén puntos negativos, que poderían ser mellorados. Fai unha pequena lista de cousas que cambiarías na historia ou na forma de debuxala. Un ejemplo pode ser a familia de Emilio, á que non volvemos a ver na historia. Que foi dela? Acaso non debería aparecer algo máis para ver o efecto do Alzheimer neles?
o Na vindeira reunión conta todo o que queiras sobre a obra. Calquera opinión será benvida.

AH, MOI IMPORTANTE!!: SE XA LECHES A OBRA, OU ESTÁS A MEDIAS, POR FAVOR, DEIXA AQUÍ ABAIXO OS TEUS COMENTARIOS.