Despois dunha parada obrigada por partos e demais cousiñas, retomamos con forza o noso clube de lectura de BANDA DESEÑADA. Desta volta, cun clásico moderno: a serie Blacksad. Comezaremos co primeiro título (hai xa tres editados, e ademais un libro co proceso de creación e entrevistas aos autores, moi interesante).
Iniciamos a aventura, pois, con "BLACKSAD, Un lugar entre las sombras" (editado por NORMA) Estamos ante unha obra do máis peculiar: personaxes animais, un realismo no debuxo despampanante, un dinamismo nas escenas que dá a sensación de estar vendo cine,... En fin, unha obra mestra.
A nosa reunión para falarmos deste primeiro libro será o vindeiro sábado 27 de xuño, ás 11:00h. (como de costume), no telecentro do Concello de Betanzos (se hai algunha modificación de última hora polo lugar, alí estaremos para avisar).
E aquí van algunhas propostas para reflexionar sobre a lectura:- A maneira en que os autores asocian animais a diferentes tipos de personaxes é moi interesante. Analiza uns cantos destes personaxes e observa que forma animal teñen. Cales son os rasgos específicos do carácter de cadaquén?
- Esta obra conta con moitos recursos tipicamente cinematográficos. Por exemplo, utiliza abundantes "contraplanos", é dicir, cambios de perspectiva da cámara, de maneira que nunha viñeta "eu te vexo a ti" e na seguinte "ti me ves a min". É dicir, trátase de cambios de perspectiva. Intenta localizar algúns exemplos de contraplanos (unha pista: na páxina 28 hai un entre o detective e o policía).
- É típico no cine atopar "movementos de cámara". Pero tamén na banda deseñada. Un deles, moi utilizado en Blacksad, é o TRAVELLING (consiste en que dá asensación de que hai unha cámara que circula polo escenario). Atopa algúns exemplos.
- Tamén hai aquí un uso dos planos excepcional. Busca algúns dos que máis che gustasen e compárteo cos compañeiros do club (Ex.: un primeiro plano especial, un plano americano que nos gusta pola sensación de movemento que aporta, unha panorámica espectacular, etc.)
- E o máis importante: trae á reunión a túa opinión, as túas impresións, que che fixo desfrutar máis e que menos. E cóntao. Quizais fagas que outros desfruten igualmente.
Ata a vindeira reunión, e BOAS LECTURAS!!
Ficha da obra:
"BLACKSAD, Un lugar entre las sombras"
Editorial NORMA
Guión: Díaz Canales
Debuxo: Guarnido
1 comentario:
A reunión foi todo un éxito en canto a análise da obra e, sobre todo, pola emoción que provocou en todos nós. Descubrimos o enorme potencial cinematográfico de Guarnido, na súa utilización dos planos, do dinamismo das escenas, no deseño dos corpos. Fixemos tamén unha reflexión detida e intensa sobre a creación dos personaxes (por que un gato, un can, un lagarto, unha rata,...). Foi incrible ver como cada especie transmitía unha serie de valores humanos. E houbo quen (a nosa sempre áxil Uxía) percibiu sotilezas como as premonicións, espalladas por toda a obra (o cimeterio que se chama "Wolfmouth", e que predí un desastre para Blacksad, o blues do orangután,...). Tamén se resaltou (desta volta joaquín) a utilización dos sepias apra a plasmación gráfica dos flash-backs. E moito, moito máis.Seguiremos coa serie Blacksad, e seguiremos comentando o que comentamos. A seguir!!
Xosé Tomás (Marimanta)
Publicar un comentario